Komuna e Prishtinës ka ndarë 350 mijë euro për trajtimin e qenve endacakë.
Sipas njoftimit të komunës, trajtimi i qenve endacak do të ndahet në shtatë grupe ku do të përfshihen të gjitha lagjet e kryeqytetit dhe zonat rurale.
“Në bazë të aplikacioneve të pranuara, më së shumti 6 kandidat do të ftohen për të dorëzuar tenderët e detajuar të kësaj kontrate. Nëse më shumë se 6 kandidat të përshtatshëm i plotësojnë kriteret e mësipërme të përzgjedhjes, përparësitë dhe dobësitë relevante të aplikacioneve të këtyre kandidatëve do të ri ekzaminohen për të identifikuar gjashtë aplikacionet më të mira për procedurën e tenderit”, thuhet në njoftim.
Kuvendi Komunal të enjten e 5 majit ka hapur tender për këtë çështje.
Afati i fundit për pranim të tenderëve është 23 maji, 2022.
Qentë endacakë vazhdojnë të jenë problem permanent me të cilin përballet Prishtina, por edhe qytetet e tjera në Kosovë.
Bazuar në të dhënat e Policisë së Kosovës, 41 qytetarë janë sulmuar nga qentë endacakë në Prishtinë dhe po aq kanë pësuar lëndime trupore, vetëm gjatë periudhës janar-mars 2022. Sipas këtyre të dhënave, gjatë vitit 2021 janë sulmuar gjithsej 89 qytetarë, ndërsa prej tyre 69 kanë marr lëndime.