Kryetari i PDK-së, Memli Krasniqi në një prononcim para mediave sot gjatë vizitës në Viti, ka folur ndër tjerash lidhur me marrëveshjen Kosovë- Serbi që u arrit sot në Bruksel.
Krasniqi e ka kritikuar Qeverinë Kurti për zvarritje të këtij procesi për 7 vjet, duke thënë se kryeministri Albin Kurti, sipas tij, po e kupton që proceset politike të udhëhequra nga PDK dhe të tjerët në të kaluarën “kanë qenë në dobi të qytetarëve të Kosovës”.
“E shoh edhe si lajm i mirë edhe si lajm i keq. Lajm i mirë është se përfundimisht kryeminstri i Kosovës bashkë me këtë qeveri po e kuptojnë që ato që i kemi bërë në të kaluarën është në dobi të qytetarëve të Kosovës. Dhe e shoh si lajm të keq se kundërshtimi i tyre dhe pasiguria e tyre politike e kanë zvarritur procesin 7 vjet”, tha ai.
“Kjo është marrëveshje që e kemi diskutuar prej vitit 2015 kur e kemi nënshkruar dhe kur është miratuar dhe konsideroj që zbatimi i saj do të mundësoj integrimin e plotë të sistemit energjetik duke përfshirë edhe faturimin e drejtë. Shpresoj që detajet t’i japë qeveria dhe jo ne”, shtoi Krasniqi.