Paraqitja e kryeministrit Albin Kurti duke qeshur në darkën me presidentin serb, Aleksandar Vuçiq, dhe emisarin e Bashkimit Evropian, Miroslav Lajçak, nxiti debat në Kosovë.
Por, kjo nuk është hera e parë që shefi i qeverisë shfaqet në humor të mirë në prani të përfaqësuesve të Serbisë.
Ai ishte parë fort i qeshur edhe në një konferencë në Londër, dy vite më parë, derisa po bisedonte me homologen Ana Bërnabiq.
Veçse për 11 vjet negociata me Serbinë nuk janë të rralla rastet kur liderët e Kosovës, të paktën në pamje, janë shfaqur të relaksuar në takimet me rivalët përtej tavolinës.
Një përmbledhje e Klankosova.tv sjell momentet më “cool” të gjithë këtij procesi, duke filluar nga takimet e nisura nga ish-kryenegociatorja Edita Tahiri për të vazhduar me Hashim Thaçin si kryeministër e president, si edhe shefat e qeverisë, Isa Mustafa dhe Avdullah Hoti.
Ky i fundit, edhe si nënshkruesi i ujdisë më të rëndësishme me Serbinë në Shtëpinë e Bardhë, kishte dy momente fort të ndryshme në takimet me presidentin serb, Aleksandar Vuçiq. Në Washington do të refuzonte të fliste serbisht, gjë që e kishte bërë paraprakisht në një takim në Bruksel.
Në kryeqendrën evropiane, serbisht kishte folur edhe Mustafa, sa që në disa raste nuk kishte nevojë për përkthyes e as ndërmjetësim.
Ndërsa Thaçit do t’i mbetet i paharruar arsyetimi dhënë botës se ai dhe homologu Vuçiq nuk ishin djelmosha problematikë.
“We are not problematic guys”, kishte thënë ai në gjuhën angleze në Forumin e Alpbachut në Austri, më 2018.